Kralendijk- Despues di hopi siman di preokupashon i un kantidat diario tòg relativamente haltu di hende ku tabata tèst positivo, poko poko pero sigur sifranan ta sigui baha.

E parti mas positivo di tur notisia ta, ku e porsentahe di hende ku ta tèst positivo a kuminsá baha i ta kedando abou. Ayera despues di hopi tempu, solamente 11% di e tèstnan a sali positivo, i pa djadumingu esaki a sigui baha pa algu mas ku 10%.

Ta di spera ku e bahada lo sigui pa por bisa ku Boneiru a logra di suprimí e ola mas resien di Covid. Mientras ku e bahada di kaso i ménos infekshon nobo, tin hopi negoshi ku ta sufriendo ya ku nan ta será for di dia 18 di mart i ya ta kasi bai hasi un luna.

Ounke no tin benta, gastunan fiho pa entre otro hür i gastonan di salario si ta sigui kore. Hopi doño di empresa a haña nan mes ta hasi un apelashon riba e areglo di NOW pa por sigui paga e empleadonan.