KRALENDIJK – Diabièrnè atardi 21 di yüli, e promé maletanan a yega na e sistema nobo, mas grandi pa entrega maleta na pasahero ku a kaba di yega aeropuerto Flamingo.

Pasaheronan di bolo di EZ Air, buelo 677 for di Kòrsou, tabata e promé ku por a kue nan maleta for di e sistema nobo. Según aeropuerto, e sistema nobo i mas grandi aki den sala di yegada ta ofresé mas espasio pa pasaheronan i ekiponan di maneho, loke ta hasi e proseso di yegada mas lihé i mas agradabel pa tur. Na mes momento ku  tabata instalando e banda nobo, nan a amplia tambe sala di yegada, pa mehorá e kapasidat di yegada pa bolo mas grandi i momentunan di pik.

E remodelashon a kuminsá i a kaba eksaktamente manera planiá, duna nan e oportunidat pa pone e banda na uso na tempu i minimisá e durashon di e situashon temporal. E fasilidatnan temporal di karga di ekipahe a funshoná bon, permitiendo e progreson lihé di e proseso di ekipahe pa tur bolo ku a yega durante e periodo di konstrukshon.

Logro briyante

“Nos ta gradisí e pasaheronan i tur parti na e aeropuerto pa nan komprensión durante e konstrukshon, i mi ta hopi kontentu ku e pasaheronan por hasi uso di e banda nobo i sala ampliá. Nos tim i e proveedor a realisá un logro briyante. Den e forma aki, nos ta ofresé servisio mas bunita na pasaheronan na nan yegada na Aeropuerto Flamingo,” asina a direktor di aeropuerto, Maarten van der Scheer a bisa.