KRALENDIJK – Fin di febrüari direktor- i maestronan di kasi tur skol básiko na Boneiru a bini huntu na MBO Bonaire pa papia tokante un estudio pa asistente di enseñansa. For di 2018 no a kuminsá mas ku e estudio akí, miéntras tin hopi nesesidat pa asistente di enseñansa prepará lokalmente. 

Ta antisipá ku e nesesidat akí lo sigui oumentá den e añanan benidero, komo ku asistentenan di enseñansa aktual riba e islanan por sigui un estudio HBO pa bira maestro. Un desaroyo magnífiko pa tantu skolnan komo studiantenan. MBO Bonaire gustosamente ta uni ku esaki, dor di reaktivá e estudio pa asistente di enseñansa. 

Dia di práktika

Durante e enkuentro ku skolnan, a papia tokante nan nesesidatnan spesífiko. Di e manera akí ta traha huntu riba un estudio ku ta konektá bon ku e práktika boneriano. Ademas a papia tokante un asina yamá dia di práktika. E deseo ta pa ún dia pa siman duna studiantenan lès na e skolnan básiko. Durante e dia di práktika akí, e studiantenan por apliká loke nan a siña direktamente. Asina nan ta atkerí eksperensia relevante i mesora nan ta un sosten èkstra pa e maestronan. MBO Bonaire ainda ta den kombersashon ku skolnan pa mira si esaki ta posibel. 

E presentenan ta mira atras posivamente riba e reunion. Nan a hañ’é un seshon informativo i ku plaser ke keda envolví estrechamente ku futuro desaroyo.