KRALENDIJK – Mas i mas por papia di molèster di parti di ofresedónan di outo di hür na aeropuerto ku no tin pèrmit pa hasi esei. P’esei Bonaire International Airport (BIA) ta splika un bia mas e reglanan eksistente ku ta na vigor pa esaki i ta anunsiá ku ta bai tene mas kontrol riba esaki. 

Anualmente BIA i tur su partnernan ta yama bonbiní na numeroso bishitante riba nos presioso isla. Hopi di nan ta skohe pa tuma un outo di hür mesora despues di nan yegada pa eksplorá e isla. Pa kumpli ku e demanda akí, tin diferente kompania di hür outo ku sufisiente outo di hür, ta operá ku outorisashon di BIA na aeropuerto. Ademas semper ta posibel naturalmente pa bishitantenan hür outo na un otro sitio. 

Lástimamente ta sosodé mas i mas ku ta ofresé outo di hür riba tereno di aeropuerto, sin e pèrmit nesesario. Esaki ta sòru pa molèster i ta stroba e aktividatnan di aeropuerto. E fasilidat di stashonamentu ta destiná na promé lugá pa bishitá aeropuerto pa su servisionan. Afortunadamente tin hopi kompania ku ta hür outo riba e isla ku si ta tene nan mes bon na e reglanan. Pa brinda klaridat, pa promové un área hustu i mantené órden i siguridat, BIA awor ta splika e maneho eksistente akí mas den detaye.

BIA ta doño di i ta manehá tereno di aeropuerto i e fasilidatnan di stashonamentu. No ta permití pa hasi aktividat komersial riba e terenonan akí si pèrmit, inkluyendo ofresé i hür outo di hür.Esei ta menshoná bon kla riba diferente bòrchi na entrada di e tereno i riba wèpsait di BIA. E reglanan eksistente akí ta konta pa tur hende i nan intenshon ta pa ta na servisio di pasaheronan den un ambiente hospitalario ku oferta di produkto adekuado. 

P’esei BIA, entrante ougùstùs 2024, lo bai vigilá mas intensivo e asuntu ku ta entregá outo di hür sin pèrmit riba tereno di aeropuerto. Banda di esei BIA lo vigilá online avisonan inkorekto kaminda ta ofresé aeropuerto komo sitio servisio di buska i hiba outo di hür, pa asina evitá ku ta informá pasaheronan robes. 

Pa buska i hiba kliente pa outo di hür na un sitio pafó di aeropuerto, tambe mester di pèrmit di BIA. Lo sigui tolerá esaki un tempu ainda, te ora ku un fasilidat di parada riba e tereno keda kla. Kompanianan ku ta hür outo interesá por inskribí nan mes na BIA for di e momentu ei, pa bou di kondishon i ku pèrmit, brinda servisio di traslado pa un lugá di hür outo pafó di aeropuerto. 

BIA ta konta riba komprenshon i kolaborashon di tur hende, pa di e forma akí traha huntu pa krea un aeropuerto hospitalario, na òrdu i sigur.