ORANJESTAD – Den e lunanan ku a transkurí komunidat di St. Eustatius a traha na konstrukshon di kahanan di morto pa entiero di nobo i konmemorashon di 69 restu di antesedentenan. 

E restunan aki, ku a eskavá na e plantashi Golden Rock di siglo 18, ta pertenesé na hòmber-, muhé- i muchanan ku nan a hasi esklavo i ku a pèrdè nan bida durante periodo di sklabitut. E konstrukshon di e kahanan, bou di guia di karpinté Julian Bass, tabata un proseso komun kaminda mas ku 20 boluntario a partisipá, entre nan homber-, muhé- i muchanan di komunidat.

Na tur a traha 66 kaha na man, enbes di 69, pasobra a dera sierto restunan huntu. E proseso di konstrukshon no tabata solamente un tarea físiko pa komunidat,  pero un eksperensia spiritual profundo. Traha kahanan huntu pa e antepasadonan a trese un sentimentu di respèt i sentido di union i a fortifiká e laso ku e parti di pasado i e almanan perdí ku lo haña nan último lugá di sosiegu.

Henter e proyekto ta un koperashon entre Statia Cultural Heritage Implementation Committee, Historical Foundation, St. Eustatius Afrikan Burial Ground Alliance i diferente otro persona for di komunidat di e isla. E tributo komun ta di gran balor i importansia emoshonal pa e habitantenan di St. Eustatius, ku mediante e proyekto por honra nan antepasadonan i e historia kompartí na un manera respetuoso.

Pais i monumento 

Aktualmente gobièrnu ta traha na asignashon di un pida tereno pa e re-entiero, kaminda lo tuma lugá un seremonia pa duna e antepasadonan nan sosiego digno. Tambe tin kòmbersashonnan ta tumando lugá ku un posibel invershonista pa finansiá e konstrukshon di un sitio konmemorativo, un símbolo tangibel di rèspèt i rekuerdo pa komunidat i futuro generashonnan. E proyekto aki ta mas ku simplemente un re-entiero; e ta un rekonosementu di un historia penoso i un tributo na e forsa i resistensia di e komunidat ku awor ta mantené e alma di nan antepasadonan bibu.