KRALENDIJK – Entrante promé di yanüari 2022 Ministerio di Asuntunan Sosial i Empleo ta oumentá e suèldu mínimo na Boneiru, Saba i Sint Eustatius ku 10 porshento. A inkluí e inflashon den esaki. E sumanan di e kompensashonnan manera penshun AOV i Ònderstant tambe ta subi.

Hende di 65 aña òf mas grandi ku tin derecho riba AOV a base di biba i traha na Boneiru, Saba òf Sint Eustatius, for di promé di yanüari 2022 ta risibí 10 porshento mas AOV. E suma adishonal pa partner tambe ta subi proporshonalmente. Tambe e penshun di viuda i wérfano (AWW) ta subi ku 10 porshento.

Ta subi Ònderstant tambe ku 10 porshento. Meskos ta na vigor pa e kompensashonnan pa yu i e kompensashonnan ku ta eksistí for di 2020 pa hende ku ta kompletamente i permanentemente inkapas pa traha i hende ku tin derechi riba AOV.

Mayornan i kuidadónan ta haña mas Kompensashon pa yu na 2022. Tantu na Boneiru , Saba i Sint Eustatius e Kompensashon pa yu pa kada mucha te ku 17 aña di edat ta bira 89 dòler pa luna.

Mehorá perspektiva ekonómiko

Den e akuerdo di gobernashon, gabinete a indiká ku pa Hulanda Karibense e prioridat ta serka mehorashon di perspektiva ekonómiko. Pa alkansá esaki, entradanan mester subi i kosto di bida mester baha. Ministerio di Asuntunan Sosial i Empleo na 2019 i 2020 a introdusí e promé medidanan pa laga Suèldu Mínimo Legal, Kompensashon pa yu i Ònderstant subi. A baha e primanan di dunadónan di trabou, i asina e dunadónan di trabou a haña espasio pa subi e salarionan di e empleadonan. 

E subimentu di e suèldu mínimo i e kompensashonnan ku 10 porshento ta un siguiente paso. E oumento ta den liña ku palabrashonnan ku a hasi den Diálogo Sentral na Boneiru i Sint Eustatius, i ku e partnernan sosial na Saba. E Diálogo Sentral ta un plataforma di deliberashon entre gobièrnu lokal, dunadó di trabou, sindikato i Kámara di Komèrsio tokante tópiko sosial ekonómiko, manera siguridat sosial i kombatimentu di pobresa.

Wak riba www.rijksdienstcn.com pa tur suma na 2022.