LIMA/WASHINGTON – Outoridatnan Peruano lo ekstraditá Joran van der Sloot, e Hulandes di 35 aña ku ta sospechoso prinsipal den e kaso di e teenager Merikano, Natalee Holloway, ku a disparsé, temporalmente na Estados Unido. E desaroyo aki ta bini dilanti despues di un deklarashon di famia Holloway.

Holloway a disparse na aña 2005 durante un ekskurshon di skol na Aruba i lo a selebrá su fecha di nasementu (36 aña) riba 10 di mei. No a demandá Van der Sloot nunka ofisialmente pa e desaparishon di Holloway, di kende no a haña su kurpa ainda.

Minister di Hustisia Peruano, Daniel Maurate Romero, a konfirmá ku e ekstradikshon ta relashoná ku akusashonnan di ekstorshon i froude ku Elizabeth Ann Holloway, mama di Natalee, a entregá. Segun fiskalnan Merikano na 2010, un ratu promé ku el a sali pa Peru, Van der Sloot a tuma $ 25.000 serka famia Holloway ku e promesa di hiba nan na e kurpa di Natalee. 

Aktualmente Van der Sloot ta sinta un kastigu di prizòn di 28 aña na Peru pa asesinato na aña 2010 di Stephany Flores, un señora Peruano. Un tratado entre Peru i Estados Unido di 2001 ta hasi un ekstradikshon temporal posibel pa kasonan den korte den e otro pais, ku kondishon ku despues di finalisá e proseso hudisial ta manda e prizonero bèk e pais di orígen.