KRALENDIJK- Hopi negoshante na Boneiru ta bai haña un sorpresa basta desagradabel na komienso di 2022, awor ku e tarifa anual pa tin un NV òf BV registrá na Kámara di Komèrsio na Boneiru ta bai triplifiká.

Na lugá di e tarifa di 80 dòler pa aña ku tabata paga anteriormente, awor aki e tarifa nobo pa un NV òf BV chikitu ta bira 240 dòler pa aña. Mester agregá ku e tarifa aki ta esun ‘abou’ ku ta konta pa empresanan chikí òf mediano ku tin un solo direktor registrá. Na momento ku tin mas ku 1 persona registrá, e tarifa ta bira asta mas haltu.

Pa empresanan mas grandi òf ku tin mas ku 1 represenante registrá ta subi ta na 400 dòler pa aña. Kiko ta hustifá un oumento asina drástiko, no ta konosí. Kámara di Kòmersio riba djaweps a saka un komunikado si ku ta papia di ’tarifanan nobo’, pero sin menshoná e forma drástiko ku esakinan ta bai subi. Ta solamente ora bishitá e wèpsait di Kámara por nota ku pa mayoria hende e tarifa ta bai bira 3 biaha mas karu. Solamente pa un Eenmanszaak e tarifa aktua, di 80 dòler pa aña ta keda apliká.

Mas karu

Mientras ku por komprondé ku Kámera di Komèrsio tambe mester oumentá su tarifanan de bes en kuando, e oumento aki ta parse hopi ekstremo. Den un solo tiro Kámara di komersio ta bira esun mas karu den tur e islanan di anterior Antia Hulandes. Por ehèmpel e tarifa pa NV i BV na Kòrsou ta di 150 florin anual, ku ta mas ku un teser parti di e lokual ta bai kobra na Boneiru.

E tarifanan nobo ta stipulá na sierto ‘peso’ ku ta bai apliká pa kada kategoria di registrashon, ku ta bai di e peso ‘1’ te na e peso ‘5’.