KRALENDIJK – Bonaire Boxing Federation ta orguyoso di por anunsiá ku Thuersten Winklaar, un di e bòksdónan mas eksperensiá di nos isla, riba djadumingu 24 di novèmber ta bai bringa den Sportcomplex Overbosch na Den Haag pa e título tan kodisiá di Kampion Hulandes den kategoria di peso pisá (heavyweight). Winklaar ta bai direktamente pa e final, kaminda e lo batayá kontra Evan Nedd den un partido desisivo di riba 92 kilo. 

E pelea pa e título akí ta un oportunidat úniko pa Winklaar representá Boneiru riba esenario internashonal. Ku un periodo di treinen intensivo ku a dura vários luna i e sosten indispensabel di su spònsernan Indebon, e departamento di deporte di Entidat Públiko Boneiru, Wilca NV, Tung Fong Store i D-shiri Holding, Winklaar no solamente ke logra gloria personal, pero e ke ta un inspirashon tambe pa e komunidat di arte marsial na Boneiru. E pelea kontra Nedd ta primintí di bira un final intenso i yen di tenshon, kaminda lo pone forsa di ámbos bòksdó te lo máksimo na prueba. 

E evento akí no ta ofresé solamente e final di peso pisá, pero tambe 18 otro kombate eksitante di bokseo. E partido di Winklaar lo kuminsá mas òf ménos 21:00-22:00 or. Ainda tin karchi na benta via www.boksen.nl i ku e kódigo BLACKFRIDAY, amantenan di bokseo ta haña 25% di deskuento. Henter e dia ta keda grabá profeshonalmente riba video i banda di esaki e kanal di televishon hulandes NOS ta transmití un parti di e programa ‘live’ tambe i kompañá pa komentario ‘live’.     

Bonaire Boxing Federation
Bonaire Boxing Federation ta hunga un ròl krusial pa hasi e tipo di prestashonnan akí posibel. E federashon ta brinda bòksdónan lokal un plataforma pa partisipashon na peleanan (inter)nashonal, sosten finansiero i guia profeshonal. Komo asosiashon e ta invertí den desaroyo di bòskdó i ta yuda nan pa alkansá un nivel mas haltu di kompetensia, algu ku ta esensial pa kresementu di e deporte i e oportunidatnan pa nos atletanan na Boneiru.