KRALENDIJK – Fudashon Tienda di Konsumidó Boneiru (FTPKB) ta nota fluktuashonnan fuerte di preis di luna un luna pa otro. Den mei, mientras ku e preis di bebida a keda stables, otro produkto básiko manera kos pa beibi, belèg, kuminda pa bestia i hariña i rano a mira un subida te ku 9%. A opservá un subida fuerte tambe den preis di bèrdura, fruta, zeta/margarina i karni/piskí, ku a mustra un oumento te 26%, mientras ku produktonan di limpieza, sopi suku a mira un bahamentu entre 10% ipa36%.

FTPKB ta atribuí e preisnan haltu di produkto fresku na faktornan manera dependensia di importashon, liña di transport largu i vulnerabel, gastunan pa karga friu, skarsidat, influensianan di temporada i e tamaño chikitu di merkado. Gastu haltu pa stòkmentu i transporte di kosnan friu ta wòrdu pasá pa e konsumidó. Skarsidat di temporada ta afektá preis, kamida e tamaño chikitu di merkado ta difikultá kompra den bùlk (na gran kantidat, redakshon).

Pa redusí preisnan, FTPKB ta sugerí stimulá produkshon lokal, koperashon regional, mehorá logístika, uzá ruta di importashon mas barata, i sostén di gobièrnu pa medio di ekshonerashon di impuesto òf duna supsidio. 

Tambe FTPKB ta mira bentaha den invershon den agrikultura lokal, kumpramentu kolektivo i kadenanan di subministrashon eficiente, ya ku esakinan tambe por yuda pa baha gastu.