KRALENDIJK- E siman ku a pasa tabata tin algun pregunta krítiko tokante e echo ku na Boneiru den 2 siman di tempu a bakuná apenas 961 hende, ku ta nifiká ku a bakuná ménos ku 100 hende pa dia. Si sigui ku e mesun spit aki, ta nifiká ku kampaña di bakunashon lo tuma bastante luna pa por kompletá.

Segun diputado Nina den Heyer sinembargo, Boneiru tin e kapasidat di bakuná hopi mas hende riba un solo dia, si esaki bira nesesario. E manera kon por logra esaki ta deskribí den e “Covid 19 Vaccinatieplan Bonaire” ku a wòrdu establesé pa gobièrnu di Boneiru.

Registrashon

Segun Den Heyer a splika, un di e problemanan den komienso tabata e sistema pa hende registrá nan mes. ‘Esaki no a funshoná bon den komienso, ku e resultado ku hende mester a warda hopi riba nan bùrt òf ku mester a kambia fecha pasombra hende a haña sita na e mesun ora’.

Fila

Aktualmente a kuminsá ku 4 fila pa hende pasa e angua ku bakuna kontra di Covid-19. Si mester, sin embargo, por redoblá e kantidat di fila aki. Tambe lo por ekspandé den e parti di a sala di gym, ma asina krea aun mas espasio. Di e forma aki, lo por bakuná te ku 840 hende riba un solo dia.

Aunke no tin problema riba su mes pa bakuna mas hende pa dia, tin algún reto si, ora ta trata di sufisiente empleado pa inyektá e hendenan ku ta pasa pa tuma nan bakuna. Otro reto ta tin sufisiente luga di parker, di manera ku ta evitá ku lo tin aglomarashon di hende, di manera ku no por mantené e distansia mínimo.

Disponibilidat

E delaster faktor ku ta hunga un ròl importante ta e disponibilidat di e bakuna, pa por injektá hende. ‘Esaki ta un balanse delikado’ asina dokter di Salubridat Publiko, Marian Luinstra-Passchier a splike. ‘No por bakuná mas hende pa loke tin na bakuna, pero tampoko por tin mas bakuna ku tin hende pa bakuná, pa evitá ku ta e bakuna bai pèrdí. Esaki ta rekerí un bon planifikashon’, asina e dòkter a splika.

---

Tambe lesa:

• 
  Caribe Nobo, Bondigro i Warehouse a bolbe resultá ta e supermerkadonan mas barata na Boneiru 
• 
  Kuerpo di bombero Saba ta optimalisá liderazgo i forsa operashonal
• 
  Diskushon tokante salario di griffier Boneiru no ta úniko: Na Hulanda tambe tin diskushon 
• 
  Segun Bonaire Human Rights Organization krísis di klima tin su raisnan den kolonialismo
• 
  Charla: Papiamentu- Idioma di Resistensia