WILLEMSTAD – Djasabra tabatin un herido durante un tiroteo entre okupantenan di tres outo. Esei a tuma lugá mainta tempran na altura di rotònde di Palu Blanku. 

Na yegada di polis e outonan a bai kaba. Despues di un tep a haña un outo na Stoppelweg dilanti di un panaderia. Eiden tabatin un hòmber ku herida di bala na su kurpa. El a deklará ku na e lusnan di Nijlweg a tira riba dje i segun su deklarashon a hib’é ku urgensia CMC.

Na Papaya a haña un di dos outo, ku tabatin seis perforashon di bala. A detené e shofùr, un Yu di Kòrsou di 18 aña.

Djasabra atardi e di tres shofùr, un Yu di Kòrsou di 24 ana, a entregá su mes na warda di polis. A detené e persona ei tambe.