KRALENDIJK- Selibon a kumpra un trùk pa rekohé sushi pa remplasá e dos trùknan ku ta kai afó. Segun e kompania ta bisa den un relato di prensa, no tin nada mas importante ku un Boneiru limpi. 

Normalmente mester di dos trùk pa rekohé shushi di kas i un trùk pa rekohé shushi di negoshi. Den práktika esaki a demonstrá di ta insufisiente. Ta opvio ku komunidat di Boneiru a krese, tin mas habitante i barionan a ekspandé. Pues ta lógiko ku awendia ta kasi imposibel pa pasa e ruta i rekohé shushi di kas den 8 ora di trabou.  

P’esei Selibon a kumpra un trùk pa rekohé shushi ku lo remplasá e 2 trùknan aktual ku na vários okashon no ta funshoná, kousando mas retraso riba ruta pa rekohé shushi. Ku esaki Selibon ta boga pa ofresé e servisio di ántes, ku nos pueblo a kustumá di risibí. Segun Selibon a splika, e trùk no ta kompletamente nobo, pero sí den un estado perfekto i komputarisá. 

Otro aña Selibon lo kumpra asta 3 trùk nobo. Miéntras tantu a kumpra e trùk grandi aki, en espera di e trùknan moderno. 

Overtaim

Selibon ta splika ku ta tumando otro desishon tambe, por ehempel di tuma mas shofùr na trabou, pa duna Alivio na esnan ku tei kaba, pa nan no mester traha muchu overtaim.