KRALENDIJK- Djamars último direktor di Bonaire International Airport N.V. (BIA), Maarten van der Scheer, huntu ku presidente di sindikato ABVO, señor George Hernandez, a firma un anekso riba e aktual Kontrato Laboral di Trabou (CAO), den kua tur empleado di BIA ta risibí entrante 1 di yüli un oumento struktural di $300,- riba e salario bruto mensual.

Ta trata aki di un palabrashon spesial, komo ku e aktual CAO ta na vigor ainda te fin di 2025. No opstante esei tantu BIA komo ABVO ta mira rasonnan bálido pa yega na un oumentu di salario struktural antisipá. E motibunan mas importante pa esaki ta e oumento di e suèldu mínimo legal den kombinashon ku e oumento di kosto di bida.

Komo resultado di e oumento salarial palabrá tur empleado ta bai dilanti ku un suma fiho. Ku e aserkamentu akí ta apliká e oumento di salario di manera sosial, partikularmente pa e empleadonan ku tin mas mester di esaki. Banda di e oumento entrante 1 di yüli 2024 lo mantené tambe e oumento salarial ku a palabrá anteriormente di 2% entrante 1 di yanüari 2025, komo parti di e CAO ku ta na vigor kaba.

Bon dunadó di trabou

“Ku e paso importante padilanti akí BIA ta demostrá ku nos ta haña importante pa personanan gana un entrada ku ta kuadra ku e situashon riba nos isla. Tambe nos kier demostrá ku BIA ta un bon dunadó di trabou i sosial”, di akuerdo ku direktor Van der Scheer. “Na mes momentu nos ta mira ku e kompensashon ku ta duna dunadónan di trabou pa e oumento di e suèldu mínimo no ta sufisiente ètòl. Tambe nos ta ripará ku hopi suministrador di BIA ta kobra BIA e gastunan di suèldu ku a subi. Tur esaki ta pone un preshon fuerte riba gastunan ku BIA mester hasi pa keda komuniká Boneiru ku e region i mundu.”