WILLEMSTAD – Djasabra último un turista Hulandes a hoga den un pisina den un kas di fakansi. Den kareda di mitar di sinku ofisina di polis na Otrabanda a risibí un yamada di un posibel hogamentu. E señora tabata ku fakansi na Kòrsou huntu ku algun otro familiar.

Na momento di e insidente e tabata su so na kas. Ora e familiarnan a regresá nan kas, nan a haña e víktima ku su kara abou den e pisina. E no tabata reakshoná mas.

E famia a drenta mesora den akshon i a saka e señora for di awa i a purba pa reanim’é, pero esei no a yuda mas. 

A mobilisá reshèrshinan tékniko i táktiko pa sigui investigá e sirkumstansianan di e insidente. Riba órden di fiskal di Ministerio Públiko a konfiská e kurpa di e señora pa mas investigashon, huntu ku algun artefakto.