KRALENDIJK- Djasabra mainta e penshonadonan organisá den Union di Penshonado Karibe Hulandes (UPKH) a bini huntu na Captain Don pa un desayuno konhuntu.

Na tur, mas ku 100 persona a asisistí na e enkuentro, ku ta e promé aktividat soshal di UPKH, despues ku e miembresia di Boneiru a sali for di Union di Penshonado Antia Hulandes (UPAH) i a bai para riba su mes pia.

Durante e mainta, presidente di Pensioenfonds Caribisch Nederland (PCN), Harald Linkels, a duna un presentashon di e situashon di e fondo, ku e a deskribi komo unu ku ta hopi bon i saludabel. “Nos a pasa den tempu di reto, pero aktualmente nos grado di kubertura (dekkingsgraad) ta na 130%. Esaki ta nifiká ku pa kada dòler di obligashon, PCN tin 1 dòler i 30 sèn den su pòtmòei”, asina Linkels a splika. E situashon favorabel di e fondo a hasi posibel ku a duna vários indeksashon den e temporada tras di luna. Linkels a bisa tambe ku ta hopi probabel ku e fondo lo por bolbe indeksá e penshunnan entrante promé di yanüari 2025.

Evelyn Cicila komo presidente di UPKH tambe a hiba palabra i a duna algu di splikashon di e plannan di UPKH pa e miembronan. Entre otro lo no selebrá dia di penshonado mas riba dia 25 di yüli manera tabata has antes, pero lo bin ku selebrashon na otra forma. Ámbos Cicilia komo Linkels a tuma tempu pa kontestá algun pregunta ku a bin delanti den e sala.

Kontentu

Diferente penshonado a ekspresá nan satisfakshon pa e enkuentro ku nan a deskribí komo hopi ameno, i a bisa tambe di lo sigui bin otro enkuento estilo ‘ban topa’ si UPKH sigui organisá esakinan.