KRALENDIJK – Union Patriótiko Boneriano (UPB), aktualmente representá ku tres asiento den konseho insular, ta kuminsá ku e bùskeda pa un lider nobo di partido.

E partido a anunsiá esaki den un deklarashon djaluna anochi. E necesidat pa un lider nobo a surgi pasobra e lider interino di partido, Maritsa Silberie, a ser nombrá hefe di Enseñansa na Ministerio di Enseñansa, Kultura i Siensia. Apesar ku UPB ekspresá orguyo den nombramentu di Silberie i ta desea éksito den su funshon nobo, e partido ta bisa ku esaki ta nifiká tambe ku ta nesesario pa bai buska un lider nobo pa e partido.

E partido ta rekonosé e trabou ku Silberie a hasi pa e partido den último tempu, pa kual nan ta bisa di ta hopi agradesido. 

Durante e bùskeda, èks diputado i  i èks-lider di partido Juames Kroon lo aktua komo bosero temporal pa e partido. 

Prinsipio

UPB ta enfatisá ku nan ta un partido guiá pa prinsipionan, dirigí riba desaroyo, i ku ta pone e ser humano sentral. “Basá riba e vishon aki, lo bai buska nos lider nobo den e lunanan benidero,” segun e komunikado pa prensa.