ORANJESTAD – Ta birando mas difísil pa introdusí 1 di yanüari 2023 un sistema fiskal nobo i mas simpel ku BTW na Aruba. Esei por dedusí for di e di dos Raportahe di Ehekushon ku sekretario di estado Alexandra van Huffelen a ofresé na Tweede Kamer.  

Último tempu Aruba a rekonsiderá e konsepto original pa e sistema aki riba algun punto. A diskutí e ahustenan di e konsepto original ku e gruponan di interes, kendenan tabata krítiko tantu riba e kontenido komo e faktibilidat di e tempu stipulá.

Tambe tabatin krítika riba subidanan di entrada ku ta haña di impuesto sin ku gobiérnu di Aruba ta introdusí medidanan pa baha gastu. Un krítika ku Kolegio di  Supervishon finansiero (IMF) di Aruba a yega di ekspresá kaba.

Skema

Mientrastantu TWO Nederland i por sierto IMF di Aruba tambe a duna konseho pa loke ta trata adaptashonnan ku tin planiá. Aruba ta studiando e konsehonan awor, lokual tin komo konsekuensia ku e planifikashon di e kambio di sistema ta kai atras riba e skema, señora Van Huffelen ta skirbi.

Un faktor ku ta komplikando e asuntu ta ku paralelo na e kambio di sistema Aruba ta trahando na perfekshonamentu di servisio di impuesto pa rekuperá retrasonan i oumentá kumplimentu ku pago.