CORO – Despues di dos luna di e reapertura di frontera marítimo entre Venezuela i e tres islanan ABC, a alkansá e límite di shen mil kilo. Esei e sekretario di Ekonomia, Produkshon i Eksportashon di e Gobernador di Falcón, Sergio Quintero, ta bisa. 

Aktualmente tin ocho barku Venezolano ku ta hasi negoshi ku diferente produkto posibel. Kuater di e barkunan aki tin un kapasidat di kuarenta te sesenta tonelada, mientras  e sobrá barkunan mas chikitu tin un kapasidat di shete pa ocho tonelada. Tin un barku ku ta spesífikamente pa transporte di piská i e tin un kapasidat di seis tonelada.

“Tin mas biahe pa Kòrsou for di e haf di fishi di La Vela, ounke e tres hafnan, Tucacas, Guaranáo i La Vela ta operashonal. Nos ta reglando tambe pa sali pa Kòrsou for di Tucacas”, Quintero ta bisa.

“Si nos kontinuá ku e velosidat aki, lo ta posibel pa alkansá e sifranan históriko di djessinku pa binti barku den  tráfiko marítimo prome ku fin di e aña aki.”

Bèrdura i fruta

E demanda riba e islanan ta prinsipalmente fruta, bèrdura i otro produkto manera banana, patia, awakati, tomati i siboyo. Tambe tabatin eksportashon di plèstik i karga seku, spesialmente pa Kòrsou, ku na promé instante tabatin su limitashonnan.

Ta spera ku ta bai añadi karbon i materialnan di konstrukshon manera santu, semènt, bentana, profil di aluminio, ètsetera na e pakete di eksportashon.

Tambe ta eksportá produktonan di lechi, manera keshi duru, “telita” i “guayanés”, prosedente di diferente produktor di wèst di Venezuela, entre kua Zulia, Trujillo, Mérida, Lara, Anzoátegui i naturalmente Falcón.

Quintera ta bisa ku ta importante ku gobièrnu di Kòrsou a prolongá e estadia di e botonan na e merkado flotante den Punda di dos pa tres luna.

Rekuperashon

Quintero no por keda sin bisa ku e esfuersonan di gobièrnu Bolivariano, presidí pa presidente Nicolás Maduro i gobernador Víctor Clark, a kondusí na respektivamente kontakto- i negosashonnan ku Reino Hulandes pa e reapertura, lokual ta hasi un interkambio formal awor posibel.

Aktualmente ta adaptá tur kos na formalisashon di e relashonnan ekonómiko segun normanan internashonal i e doñonan di barku poko poko ta familiarisá ku e eksigensia- i proseduranan nobo, tantu riba tereno di migrashon komo nóutiko.

Quintero ta enfatisá ku kada barku aktivo ta krea djessinku pa binti kupo di trabou Venezolano dirèkt, banda di e empleonan indirèkt ku ta surgi for di e transporte di karga, sentronan di produkshon, hafnan i tur e aktividatnan ku mester desplegá for di desaroyo di un produkto te ora e yega serka e konsumidó. 

Sektor privá

E funshonario ta aksentuá ku ta sektor privá ta ehekutando e aktividatnan di eksportashon, ku sosten di gobièrnu pa por realisá e prosesonan mas fásil.

A tene reunionnan ku tantu representantenan di Mérida i Trujillo ku tambe ta interesá den e posibilidat pa eksportá for di e region, komo ku invershonistanan internashonal pa sondea e posibilidatnan i tuma akshon pa mehorá.