KRALENDIJK – E aerolínea WestJet di Canada, fin di e aña aki lo boble ofresé buelonan entre Toronto i Boneiru. E promé temporada ku ta serka di klousurá e resultá hopi eksitoso. 

For di 10 di desèmber 2024 WestJet lo reanudá e skema di temporada di wenter ku buelo pa Boneiru riba djamars, ku salida for di Toronto pa 10:10 or, yegada na Boneiru pa 16:30 or i salida for di Boneiru riba djárason pa 09:00 or i yegada na Toronto pa 13:29 or. E temporada ta dura te ku 30 di aprel 2025.

Miles Mercera, direktor di TCB ta hopi kontentu ku e desishon di e aerolínea: “E kolaborashon akí ta brinda konektividat fásil pa bishitantenan kanades ku ta bin Boneiru, i ku anhelo nos ta spera un otro temporada eksitoso atrobe.”

 “E ruta akí a engrandesé Boneiru su popularidat na Canada i nos ta hopi kontentu di por yama bon biní na e bishitantenan akí un biaha mas na nos isla,” asina direktor di BIA, Maarten van der Scheer, a bisa.

Diputado Clark Abraham, di Ekonomia i turismo, tambe ta positivo. “Nos ta sumamente kontentu di por yama bon biní na nos bishitantenan for di Canada pa kompartí e eksperensia úniko di Boneiru ku nan. Nos ta spera di sigui traha huntu ku WestJet riba un kolaborashon mutuo bentahoso i kontinuo pa por risibí nos amigunan kanades durante henter aña,” asina diputado Clark Abraham a trese dilanti.

Atraktivo

Veroesjka de Windt, direktor di BONHATA, ta mira e disishon di WestJet komo faborabel pa e sektor hotelero.  a bisa: “E ‘partnership’ akí ta un prueba di e kolaborashon ku nos partnernan na nos isla i nos dedikashon pa hasi Boneiru aksesibel i atraktivo pa un públiko mas amplio, di manera ku kada biahero ta haña un eksperensia inolvidabel.” De Windt tin e speransa ku e buelo ku ainda ta wòrdu ehekutá solamente den temporada di winter, den futuro lo por sigui operá hinter aña.