RINCON – Sociedad San Antonio de Padua na Rincon  ta selebrá 100 aña di eksistensia dia 1 di novèmber 2024. Dia 1 di novèmber 1924 a funda e organisashon despues ku Alexander Simon Pourier a kuminsá propagá e idea pa funda un sosiedat liber. Liber ta enserá ku e miembro no nesesariamente mester ta katóliko manera tabata e eksigensia pa a bira miembro di sosiedat di pastor. 

Ta netamente regla entiero na un manera respetuoso a kondusí na e idea pa lanta un sosiedat. E gastunan mará na entiero a aselerá e proseso pa funda Sociedad San Antonio de Padua.

Tur organisashon ta kuminsá ku mashá entusiasmo i ánimo. Sociedad San Antonio de Padua no tabata un eksepshon. Pa e organisashon a funshoná na bienestar di e miembronan no tabata fásil, pero miembronan ku a kontribuí na un manera spesial den desaroyo di e sosiedat, sea komo miembro di direktiva of komo miembro partisipando na reunionnan general, a pone ku Sociedad San Antonio de Padua ta aktivo ainda i ta kumpli 100 aña di eksistensia dia 1 di novèmber benidero.

E sosiedat den su esensia a kambia durante tempu, pero e tradishon di solidarismo komo base di e sosiedat no a kambia i a funshoná semper.

Meta di Sociedad San Antonio de Padua ta pa defende interes di su miembronan a base di nan filosofia di bida i pèrkurá  pa un entiero digno den mas ámplio sentido di palabra.

E partisipashon aktivo di e miembronan ta hasi posibel ku Sociedad San Antonio de Padua por kumpli 100 aña di eksistensia.

Miembronan por kumpli ku nan deber di paga kontribushon riba djadumingu ora ku ofisina na Rincon ta habrí for di 9’or te 12’or.

Personanan entre 12 i 49 aña ku ta interesá ta bonbiní pa bira miembro.