WILLEMSTAD – A pidi djesseis aña di kastigu di prison pa anterior agente polisial Mariens Mariano pa su papel prinsipal den robo di droga na Rio Canario.

E kaso ku tin e nòmber Inex 2.0 ta trata di 600 kilo di kokaina ku a hòrta den anochi di 13 pa 14 di òktober 2018.

Ta sospechá Mariano di 32 aña di ta enbolbí komo agente polisial na momentu di trese 340 kilo di kokaina tera. A tuma e lote den beslag i a ward’é den kaha fuerte na warda di polis Rio Canario.

Na momentu di e kiebro un luna despues ta hòrta tur e droga, 530 kilo di kokaina i 14 kilo di mariwana,  ku ta wardá eiden.

Segun Ministerio Públiko Mariano lo tabata enbolbí tantu ora di plania e yegamentu tera komo e robo na Rio Canario.

Ministerio Públiko ta bisa ku na momentu di prepará e kastigu penal a tene kuenta ku ta Mariano su promé delito. Pero loke ta pisa mas ta ku el a kometé e echonan mas importante durante e periodo ku e tabata agente polisial ainda i e brutalidat pa kibra i drenta serka su propio doño di trabou. 

Inakseptabel, segun Fiskal. Komo agente polisial Mariano a hasi hopi daño na kuerpo polisial.