PARAMARIBO – E direktor Hulandes di Surinaamse Luchtvaart Maatschappij, SLM, Paul de Haan, i un èks-konsehero importante di presidente Chan Santokhi, Prenobe Bissessur, a haña un prohibishon pa sali for di Sürnam.

Pero e sitio di notisia Starnieuws ta skirbi ku a komprondé di diferente fuente ku mientrastantu De Haan a bandoná e pais. Sinembargo polis no por konfirmá esei ainda.

De Haan lo a biaha via tera bai pais bisiña Guyana Franses i, segun fuentenan di Starnieuws, e lo ta na kaminda pa Fransia. Dos dia kaba e no a aparesé na trabou. De Haan i Bissessur tin prohibishon pa sali e pais pa motibu di nan presunto envolvimentu den e mal maneho na SLM i un investigashon penal  pa posibel froude na e aerolínea di Sürnam.

Bissessur tambe a hasi un intento pa bandoná Sürnam. E ke a biaha ku avion bai Miami. Polis a logra evitá esei ora ku nan a detené  na aeropuerto i tuma su pasaporte, diferente media ta informá. Bissessur lo tabata risibiendo ya pa basta tempu kaba un salario di 17.500 euro pa su servisionan komo konsehero di SLM.

Den parlamentu di Sürnam Santokhi a reakshoná riba e asuntu. “E pagonan i e montante ta inhustu i desproporshonal”, el a bisa tokante di e kompensashon pa Bissessur, ku e mes lo no kontratá mas komo konsehero. “Lo bai wak posibilidatan pa rekobrá e sènnan aki bèk.”

Den último añanan SLM a traha un debe di kasi 75 mion euro. Tabata e intenshon pa De Haan, ku nan a nombra na aprel 2019, implementá un plan di reskate pa salba e kompania.