Kralendijk- Gezaghèber Edison Rijna djasabra atardi den un mesahe di bos i video a ekspresá ku e ta desapuntá den komprtashon di sierto hende riba e isla, despues ku a suavisá medidanan preventivo kontra di Corona.

Segun e promé mandatario gruponan grandi a sali huntu djabièrnè, ku tabata e promé anochi despues di toke di keda. “Mi ta komprondé e nesesidat di suidadano pa sinti nan mes liber. Pero loke a pasa ta iresponsabel. Gruponan grandi a bini huntu i no a mantené nan mes na regla ku ta keda vigente, por ehèmpel tenementu di distansia di 1.5 meter”.

E promé mandatario tambe a menshoná ku vários kaminda tabata tin tokamentu di muzik muchu duru, i te muchu lat. Rijna a hasi un apelashon spesialmente na e hobennan. “Boso por kousa, ku aktitut iresponsabel ku mester bolbe introdusí medida mas severo i ku mas hende mester keda será den kas mas tantu tempu”.

Kòntròl

Rijna a bisa tambe ku for di e wikent aki, lo kuminsá hasi kòntròl ku mas regularidat, i lo tuma medida ora konstatá ku reglanan ta wòrdu violá. “I si mester mi ta bolbe introdusí medida mas estrikto pa e dianan di fiesta”, asina Rijna a taha den su mensahe.

E promé mandatario a hasi un apelashon riba habitante pa mantené nan mes na regla i koperá pa situashon no sali for di man atrobe. “Ainda nos ta den un situashon serio”, asina Rijna a bisa.