KRALENDIJK- Djaweps mèrdia a tuma lugá apertura ofisial di e promé Skol Eksepshonal na Boneiru. E ta karga e nòmber di un siudadano ku a hasi hopi pa e komunidat den enseñansa, den e persona di Emmy Schermer.  

A kuminsá e atardi ku un poesia na enkargo di Jeaniro Dorothea, i tabatin kantidat di dosente i otro invitado presente. 

“E idea aki ta bon i no tabata un kaminda fásil. A hasi diferente sondeo, plan van aanpak, pa por a yega na e dia di awe. E muchanan ku ta bai haña lès aki meresé. Huntu nos ta un komunidat. Hopi bia ta lesa den korant, ku no ta buta tempu pa e parti aki. A traha den silensio i awor e ta kla” asina Nolly Oleana a trese dilanti di parti di OCW. 

“Anoek Hansen, direktora di EOZ, i su tim a hasi bon trabou, pa e kaminda ku nos a kana yega awe. Anoek i Juraima sa. Hopi traba, pero huntu ku koleganan di Hulanda, nos a logra. Kolegio Emmy Schermer, ta e komienso. Esaki ta promé stap. Nos muchanan meresé mihó” asina Marita Silberie a trese dilanti. 

Emma Schermer

E persona ku kua a yama e skol eksepshonal a keda mashá honrá ku e echo ku e skol a haña nòmber Kolegio Emmy Schermer. Nan a yama mi puntra si por usa mi nòmber pa e skol básiko, pa yuda muchanan ku mester di èkstra atenshon. 60 aña mi a traha pa enseñansa. Mi gusta yuda” asina Schermer a trese dilanti.