KRALENDIJK- MCB Boneiru den kuadro di su sesenta aña di eksistensia a hasi un donashon na kuater diferente organisashon ku, segun e banko, ta hunga un ròl importante den komunidat. 

E promé donashon a bai na ZW-groep. Zorg en Welzijn groep, manera MCB a trese dilanti ta un grupo no-gubernamental ku ta duna sosten i servisio sosial, kuido pa grandinan i tambe personanan ku problema di bista i oido. Grupo di enfoke ta esnan ku un limitashon, malesa kroniko i nos grandinan. 

Federashon Di Futbòl Boneriano (FFB) tabata e di dos respiento di un donashon. “Resientemente FFB a organisá pa di 5 aña Kopa Lito, un evento ku a kuminsá ku mas o ménos 250 hóben, i entre tanto esaki a krese ku partisipashon di mas ku 800 mucha i hóben. Importante ta ku e organisashon ta akapará nos hóben nan den tur bario, tambe e diferente klup i lidernan, ku esaki ta yuda den e proseso di edukashon di un komunidat” asina MCB a motivá e donashon. 

E di tres resipiente ta Tourism Corporation Bonaire (TCB), ku su introdushon di ‘Bonaire Bond’, un promesa di destinashon ku ta invitá bishitantenan pa biaha na un manera responsabel i pa respetá nos isla. Segun ku Boneiru ta krese den popularidat, nos isla ta hasi esfuerso pa anda konsientemente ku esei pa medio di atraé bishitantenan for di rònt mundu ku ta mes konsiente. 

E di kuater organisashon ku a risibí un donashon ta Fundashon Históriko Kultural Boneriano. “E fundashon aki durante di e último 30 aña nan a dediká inkansablemente na dokumentá, kolekta, i konserva tur loke ku tin di aber ku Boneiru si patrimonio kultural, natural i históriko”, asina MCB a bisa.