E diseño ku a keda presentá siman pasá. Pòtret: BOG

KRALENDIJK- E inisio di e proyekto nobo di ku Bonaire Overheidsgebouwen N.V. (BOG) ta bin kuné a inisiá kasi 10 aña pasá, pa ta eksakto den aña 2012. Esaki direktora di BOG, Adely Jansen, a konta durante su presentashon djabièrnè ku a pasa. 

Segun Jansen, den e tempu ei, ku aprobashon di gobièrnu a tuma e desishon pa bende e tereno di anterior Sunset Beach Hotel. Den esaki, gobiernu di Boneiru a proponé pa repartì e tereno aki den 4 pida. E hotel Chogogo ta ubiká riba 2 pida parsela. Mas na suit ta e parsela ku Bonaire Sunset Beach Resort ta bai desaroyá. Kaminda nos ta pará aki te na e rotòndu ta e parti ku gobiernu a proponé pa keda desaroyá komo un area publikó.

E persona ku a kuminsá ku e preparashonnan ta e direktor di BOG di e tempu ei, John Soliana. E konsehero i e ‘brain’ tras di e kreashon aki lamentablemente no por ta presente awe pa motibunan di trabou den exterior, señor Farley Virginia di Heren2. Despues di tur e tempu, awor BOG ke realisá e proyekto berdaderamente. Di e forma ak, BOG ke mustra tambe ku e kompania di gobièrnu tin aden. 

Aksesibel

Jansen a enfatisá ku e parke públiko lo ta aksesibel pa un i tur i lo tin algu di ofresé na vários grupo. Asina lo bini ku un fasilidat di ‘fitness’ kaminda lo tin diferente aparato ku por wòrdu husá pa train. 

Tambe lo bini un area kaminda muchanan chikí por hunga. Pa e área pa mucha a eloborá ku Jantje Beton ku a hasi un investigashon bou di nos muchanan na Boneiru pa por haña sa kiko ta deseo di nos hobennan pa loke ta trata parke di rekreashon. E muchanan a indiká ku nan kier algu di awa. Nos a duna oido na deseo di nos muchanan i nos a inkorporá un elemento di awa den e área aki.

Mivabo

Segun Jansen a splika, BOG a sinta tambe ku MIVABO i e departamentu di Samenleving en Zorg. “Nos a kòrda riba nos grandinan i persona ku inkapasidat fisiko. E persona nan aki por move trankilamente tur kaminda den e parke.  Ta bai bini un ‘helling’ pa hendenan ku tin un inkapasidat físiko pa baha den laman na un manera seif i un area di parkeo”, asina Jansen a bisa.