KRALENDIJK- Según anterior miembro di Konseho Insular, Michael Pieters ta manera obvio ku e gobièrnu di MBP ku UPB tin hopi kos di skode. 

“Durante di reunion di Konseho Insular, un proposishon a subi mesa di parti di presidente pa Konseho Insular disidí si ta tene tres rapòrt konfidenshal. Ta trata di e rapòrt tokante BonLab, Rotonde Kaya Amsterdam i e desaroyo na e tereno konosí komo Sunset”.

Segun Pieters ta bisa, ta konosí ku e tres rapòrt nan aki a keda mandá pa Kolegio Ehekutivo i pa Konseho Insular ku un karakter di konfiabilidat. Pieters ta notaku durante di reunion di Konseho Insular a pone esaki na votashon i tabata e frakshonnan di MPB i UPB ku a vota pa tene e tres rapòrt nan aki sekreto.

“Ta mas ku obvio ku akinan e Kolegio Ehekutivo ku soten di 5 miembro di MPB i UPB tin kos di skonde. Pa loke ta trata BonLab, ta obvio ku di parti gobernashon di MPB/UPB nan a faya flagrantemente i no a defendé eksistensia di NOS BonLab”, asina Pieters ta bisa.

Otro tópiko interesante, según Pieters ta asuntu di e rotonde na Kaya Amsterdam ku tabata T-kruising, a bira Rotonde i entretantu a bolbe bira T-kruising. “Ta konosí ku tabatin un deroche di plaka di por lo menos 800 mil dòler. Akinan polítika partidista a hasi su infuensha den desishonnan pa ku realisashon di e rotòde aki. Tur hende sa ta ken ta e mandatario ku a kometé e vupá aki pero ningun hende no kier mustra e dede pero e berdat si ta konosí”, según Pieters ta bisa.

Sunset

Segun Pieters ta bisa, pa loke ta trata e desaroyo na Sunset tambe tabatin bastante chachuyo a tuma lugá i ta mas ku klaro ku kier trata di skonde e kosnan te ku despues di elekshon.

“Na mi apareser pueblo di Boneiru mester kòrda esakinan i hopi mas pa otro aña dia 15 di maart 2023 kore ku e partidonan MPB i UPB pa semper. Un gobièrnu ku 4 aña largu no tabatin un plan ni un maneho i ku a sòru pa puesto, plaka i poder pa nan hendenan i lubidá e mayoria di e pueblo” asina Pieters a klonkluí.