WILLEMSTAD – Curaçaose Touristen Board CTB ta informá ku kasi 43.000 turista a bini Kòrsou den ougùstùs. Na 2019 den luna di ougùstùs kasi 39.000 turista a bini e isla pa dos dia òf mas, pues un kresementu di djes porshento.

Hulanda, Estados Unido i Colombia ta e paisnan mas importante di unda e turistanan ta bini. E tres paisnan ta responsabel pa setenta porshento di tur bishitante ku ta bini Kòrsou den ougustùs 2022 pa keda dos dia òf mas.

For di informashonnan di imigrashon ta sali na kla ku bishitantenan di Europa a keda den luna di ougùstùs un averahe di 11.4 anochi, mientras e averahe ei den ougùstùs di 2019 tabata 10 anochi. Di e bishitantenan di Europa aki 59 porshento a keda den risòrtnan.

For di e region di Norteamerika a registrá en total kasi 9.500 bishitante. Kasi 9.000 a bini di Estados Unido. Ta di tres luna konsekutivo ku Curaçaose Touristen Board  ta mira kantidatnan di anochinan rèkòrt ku e bishitantenan di merkado Merikano ta keda.

Kòrsou tin awor un kantidat mas grandi di risòrtnan Merikano, ku ta duna fruta spesialmente pa merkado Merikano. Setentinuebe porshento di bishitantenan di Estados Unido a keda den risòrtnan. E averahe di pasa anochi na Kòrsou tabata 6.3, lokual den e mésun luna na 2019 tabata 5.9 anochi.

Ocho barku di turista a bishitá nos den ougùstùs i a trese mas ku 26.000 turista krusero.

Curaçao Tourist Board (CTB) ta raportá asta fecha di awe kasi 320.000 yegada di turista ku ta keda mas ku un anochi den e promé ocho lunanan di aña. Den 2019 CTB a registrá kasi 314.000 wéspet ku a keda mas ku un anochi. Un subida leve di un porshento.