KRALENDIJK- Despues di basta buelta siman pasá den reunion di Konseho Insular, awor MPB i UPB supuestamente lo ke hasi tres rapòrtnan krítiko tòg aksesibel pa pueblo. Esaki e lidernan di frakshon di MPB i UPB a trese dilante den un komunikado konhunto.

“Konseho Insular resientemente a risibí un grupo di tres rapòrt konfidensial. Ta trata di QuickScan BonLAB, Development Agreement Sunset i e investigashon tokante e rotònde Kaya Amsterdam. E partidonan di koalishon (MPB i UPB) ta karga e prinsipionan di transparensia, integridat i bon Gobernashon enormemente na haltu. Pueblo mester ta na altura di loke a disidí i na ki manera ta tuma desishon. Tambe na momentunan ku asuntunan no a kana bon, mester siña di esaki i mester duna publisidat na kua lès a siña for di esaki”, asina ta trese dilante den e komunikado.

Sgun MPB ku UPB e partidonan di koalishon tin komo meta pa mas pronto posibel kita e karakter di konfidensialidat for di e rapòrtnan, na momentu ku por garantisá ku a respetá informashon di karakter di konfidensialidat di empresa i di privasidat.

Konfidensialidat

Segun e liña di e terser insiso di artíkulo 26 di WolBes i segun e prinsipionan di e Lei di Publisidat di Gobernashon mester praktiká publisidat sinembargo ku koutela den kua mester konsiderá diferente asuntu, bou di nan informashon ku ta kontené konfidensialidat di empresa òf ku ta di karakter di privasidat.