KRALENDIJK – Emisora di radio Paradise FM ta transmití for di 3 te ku 7 di òktober bibu for di Boneiru. Esei lo sosodé tur dia for di un otro sitio. E siman di transmishon ta kai presis den fakansi di verano i durante Bonaire Regatta i ta un kolaborashon ku Tourism Corporation Bonaire, TCB.

Direktor di e emisora, Joris Reer, ta bisa ku Boneiru ta floresiente  den e siman ku e emisora di Kòrsou ta transmití. “A parse nos un bunita momentu pa un biahe i un oportunidat úniko pa duna nos hermana isla publisidat”.

Reer ta referí na e popularidat kresiente riba tereno turístiko i riba e hotèl- i restorantnan nobo ku a bini aserka e último añanan. “Despues di diferente kòmbersashon ku Miles Mercera di Tourism Corporation Bonaire nos a disidí di organisá e siman spesial aki. Pa Boneiru e ta un chèns úniko pa ta den spòtlait na Kòrsou’, Reer ta bisa.

E siman na Boneiru aki lo tin entrevista ku habitantenan prominente, vários video i pòtrèt riba kanalnan di medionan sosial di Paradise FM i tur dia e emisora lo transmití for di un otro sitio riba e isla, manera entre otro Sorobon Beach Resort i e ofisina prinsipal di TCB.

Naturalmente e emisora lo duna hopi atenshon na aktividatnan rondó di Regata di Boneiru ku ta tumando lugá den e mésun siman.