WILLEMSTAD – Gasolin i disel ta baha di preis otro siman. Pa un liter di gasolin bo ta paga for di djamars 27 di sèptèmber 2,58 florin. Esei ta kasi 4 sèn ménos ku awor.

Preis di disel ta baha ku mas ku shete sèn i ta bira 2,15 florin pa liter. Ku e adaptashonnan nobo di preis gasolin ta baha pa di dos luna siguí. E luna aki asta a adaptá e preis dos biaha.

BTP, ku ta esun ku ta kontrolá, ta bisa ku e bahada di preis ta un konsekuensia di un korekshon riba e komponente di ekseso i skarsedat. Ta stipulá e preis di kompra a base di e reserva di kombustibel disponibel. Despues ta deskontá e diferensia entre e preis di kompra regulá i e kompra real via e komponente aki.

Awa i koriente

Promé di òktober koriente ta subi kasi un sèn pa Kwh. E tarifa mas barata ora usa te 250 Kwh ta kosta na òktober algu mas ku 78 sèn pa Kwh.

Awa tambe ta subi. Un küb kosta entrante 1 di òktober kasi 16 sèn mas. Esun ku no usa mas ku nuebe küb, mester paga 9,68 florin pa kada 1000 liter. Esun ku usa mas ku binti küb, ta paga 18,73 florin pa kada 1000 liter riba e binti küb.

E subida leve di tarifanan di koriente i awa ta resultado di promedio di gastunan di kombustibel pa produkshon di koriente, respektivamente gastunan mas abou di koriente pa produsí awa i un faktor di korekshon mas haltu pa koriente i awa ku ta un poko mas haltu pa luna di ougùstùs 2022.