Kralendijk- Gezaghèber Edison Rijna, den un video ku a manda via vários kanal, ta hasi un apleashon riba pueblo pa no bai Rincon pa dia di Rincon.

Rijna a splika ku por selebrá e dia si den seno familiar, tumando na kuenta e reglanan ku ta konta pa nivel di riesgo 4. Hende por bai di bishita na otro hende su kas, pero Rijna a rekordá ku na tur no mester ta ku mas ku 10 persona na e kas konserní.

Tambe Rijna a rekordá ku no tin mag di tin fiesta òf evento. Rijna a hasi un apleashon spesífiko pa hende ku no ta biba òf traha na Rincon, pa no bai Rincon djabièrnè.

Virtual

Rijna a bisa tambe ku lo no tin aktividat físiko na Rincon pero solamente virtual. Tambe Rijna a enfatisá ku si lo mester resulta ku tin aglomerashon tòg, polis lo aktua mesora.

But

Rijna a menshoná tambe ku e but pa violashon di regla riba e dia aki ta subi na e máksimo di 280 dòler, ademas esaki ta konta tambe pa violensia kontra polis i tambe pa insulto kontra di polis. E promé mandatario a hasi tambe un apelashon spesífiko di komportá nan mes bon i tene nan mes na regla.

“Mi tambe ta lamentá ku e aña ai un biaha mas nos no por selebrá Dia di Rincon manera kustumber, pero mi tin ku sali na defensa di salú di tur siudadano”, asina Rijna a bisa.

• 
  Fundashon Across The Isles ta bai kordiná  aktividat rondo di  historia di sklabitut na Boneiru
• 
  Tayer skibi buki pa mucha tokante herensia kultural, tabata un gran éksito
• 
  Fondo Nasional di Restorashon ta duna un fiansa pa restorashon di The Old Gin House na Sint-Eustatius
• 
  Kampaña nobo ‘You’ve got the power’ a ranka sali na Boneiru
• 
  Thuersten Winklaar ta bringa pa e título di Kampion Hulandes na Den Haag