WILLEMSTAD – Minister Javier Silvania ta bai pone e tokenan final na e lei nobo di Duana pa presentá esei mas lihé ku ta posibel na Parlamentu.

A diskutí e Algemene Landsverordening Douane en Accijnzen, ALDA, ku representantenan di Duana.

For di 2016 a presentá e konsepto di ALDA na Parlamento. Tambe a entregá un petishon na Konseho Sosial Ekonómiko, Sociaal Economische Raad, i Kuerpo di Konseho, Raad van Advies, pa duna konseho, lokual a sosodé tambe.

Den kuadro di akuerdonan nashonal i internashonal minister Silvania ta bisa awor ku ta na su lugá pa formalisá e derecho di duana formal i establesé reglanan renobá pa e supervishon di duana, speshalmente pa loke ta trata derechonan di importashon, akseins i harmonisashon di  proseduranan di duana.

No ta e intenshon di e minister pa traha un Ordenansa di Lei nobo, pero pa trese kambionan den e lei eksistente.

Ku e kambionan aki e presupuesto mester keda neutral i no mester kontené oumento di tarifanan. 

Un grupo di trabou ta enkargá ku trabounan relashoná ku ALDA i lo studia tambe simplifikashon di impuesto di importashon.

Despues di prosesamentu di e kambionan i sin duda e konsehonan di e partidonan menshoná, e minister lo ofresé e ALDA atrobe na Parlamentu.