WILLEMSTAD – Tur notario mester presentá promé ku fin di e siman aki tur akta i repertorionan atrasá na inspektor di impuesto. Esei minister di Finansas, Javier Silvania ta èksihí despues di publikashon di un rapòrt di Kontrolaria General.

E Inspektor a notifiká e notarionan kaba den luna di ougùstùs. Den konsulta ku un delegashon di e notarionan a disidí pa amplia e término pa entrega regular entrante  luna siguiente.

Segun e minister esei no ta kita ku mester rekuperá e retraso den entregá aktanan i repertorionan promé ku 1 di òktober. “Si despues di 1 di òktober e notarionan entregá aktanan i repertorionan lat na inspektor, lo tin un multa di 100 florin pa kada siman ku entregá un akta òf repertorio lat”.

Pa impuesto di transferensia por imponé but di 5 te 15 porshento di e montante ku debe, e rapòrt resien di Kontrolaria General di Kòrsou ta indiká.

Den kasonan di falta grave òf intenshonal por imponé e notarionan asta multa pa negligensia di 25 te 100 porshento di e montante ku debe.

Anteriormente e luna aki, riba 16 di sèptèmber, Kontrolaria a emití un raportahe di e kontribushon temporal i kompleto di impuesto di transferensia ku e notarionan a retené. Einan a sali na kla ku diferente notario a surpasá strukturalmente e término legal di deklarashon i pago di impuesto di transferensia.

Tambe Kontrolaria ta konstatá ku servisio di impuesto kasi nunka no a imponé multa ni kontribushon adishonal na e notarionan ora nan a surpasá e término legal.