Apresiabel lesadó, 

E último simannan nos a pasa den hopi kos huntu. 18 di mart Boneiru a bai den lockdown pa motibu di e kantidat haltu di infekshon. Promé nos tabata na nivel di riesgo 6, pero awor danki Dios nos a baha na nivel di riesgo 4. E kantidat di infekshon a baha konsiderablemente pasobra nos komo komunidat a tene nos mes na regla. E bon notisia ta ku nos a laga mira ku si tur hende hasi esfuerso, nos por hasi un diferensia. Nos ta dispuesto pa hasi sakrifisio pa nos mes i pa otro.  

Último simannan nos mester a biba sin enkuentro ku amigu i famia. Nos no por a hasi deporte ku otro òf bai gym. Tampoko bebe un serbes ku amigu na snèk òf bai kome ku un grupo na un restorant. E kreyentenan bou di nos físikamente no por a bai nan misa òf sirbishi. Nos a siña pa for di 21:00 keda paden i a kustumbrá ku e kayanan morto. Tin biaha nos tabata ketu i tristu pasobra e vírùs di corona a ranka hende for di meimei di nos.  

For di prinsipio di e krísis di corona, hopi hende a pèrdè trabou. Serka hopi famia sèn no ta yega. Danki Dios ku den e tempunan difísil akí tabatin hende ku a laga mira nan mihó kara. Por ehèmpel e boluntarionan ku a kushiná pa hendenan ku di otro manera lo no a kome un kuminda kayente. Ademas tabatin negoshi i persona ku a duna pakete di kuminda na muchanan di skol i famianan ku tabatin mester di esei. 

Empresario, bar, hotèl i restorant tambe tabatin tempu difísil. Serka hopi di nan, awa a yega te na nan lepnan. Algun di nan obligatoriamente mester a sera nan negoshi. Otronan apesar di e krísis, di un manera kreativo a logra ofresé nan servisionan i produktonan, manera introdusí kuminda pa bai kuné.  

E último lunanan nos siña ún kos. Esta ku nos tin mester di otro pa sali for di e krísis. Huntu nos por pèrkurá ku Boneiru ta mihó protehá kontra e vírùs di corona. Esei por si nos bakuná. Asina bo ta protehá no solamente bo mes, sino tambe bo famia, amigunan i hendenan vulnerabel den nos komunidat. Lo tin ménos preshon riba kuido i hendenan djafó por bishitá Boneiru atrobe. Nos ekonomia pa un gran parti ta basá riba turismo, p’esei nos ke risibí turista atrobe. 

A pone nos pasenshi na prueba hopi biaha e último lunanan, pero pasenshi ta gana gloria i union ta hasi forsa!   

Stay safe!