AMSTERDAM – KLM ta bai bula ku mas hende pa e área di Karibe i visevèrsa. Ta amplia e stulnan ku mas ku binti porshento. KLM ta ofresé buelonan pa Kòrsou por lo ménos dies biaha pa siman, ku dos buelo pa dia durante periodo di Pasku. Esei luchtvaartnieuws.nl ta informá.

Pa e buelo pa Aruba den kombinashon ku Boneiru KLM lo usa tur dia e avion di mas grandi di su fleta, e Boeing 777-300ER ku 408 stul.

E ret di KLM tin e invierno benidero na tur 163 destinashon. Ku esaki e demande ta keda kasi meskos ku e nivel di aña pasá. Dentro di Europa lo kuminsá ku kuater ruta nobo. Banda di e ampliashon di e kapasidat pa islanan den Karibe e ampliashon pa Estados Unido tambe ta remarkabel.

Norteamerika

E ret interkontinental ta kubri 71 destinashon. Djesnuebe ta den Canada, Estados Unido i Mexico. Bulando mas tantu biaha i ku avionnan mas grandi e kapasidat di stul ta subi ku djesun porshento, kompará ku e periodo promé ku e krísis di corona.

E invierno aki ta posibel pa buk e Premium Comfort-Class nobo di KLM pa vários destinashon den Estados Unido i Canada. Den e class aki, ku ta entre  Economy Class i World Business Class, e klientenan ta eksperensiá un konsepto di servisio nobo di KLM den un kabina apart ku, segun ta bisá, tin stul komfortabel i hopi espasio pa pia.

Suramerika 

E kantidat di stul riba buelonan pa Suramerika ta oumentá e invierno aki ku seis porshento. KLM ta bula tur dia pa Argentina, Brazil, Chile, Colombia i Peru. Pa Costa Rica ta bula kuater biaha pa siman. KLM lo efektuá sinku buelo pa siman pa Paramaribo ku e Boeing 777-300ER. Tambe KLM lo kombiná Buenos Aires den Argentina ku Santiago de Chile den Chile.