WILLEMSTAD – Ku hopi entusiasmo  asosashon di e sektor hotelero, CHATA, a tuma nota di e promé pasonan konkreto pa introdusí turismo komo materia na skolnan.

Siman pasá Ofisina di Turismo di Kòrsou CTB a anunsiá e inisiativa aki na Coromoto College.

Ku regularidat CHATA a insistí serka outoridatnan kompetente pa krea espasio pa turismo komo materia na skol, pa asina na edat hóben tur alumno bira konsiente di e importansia grandi ku turismo tin pa e isla.

E echo ku Ofisina di Turismo di Kòrsou a logra pa realisá e proyekto aki, meresé tur elogio segun Chata. E organisashon ta spera tambe ku despues di e promé stap aki ta sigui e siguiente stapnan adekuá.

Esei ta nifiká ku na promé lugá mester tin un garantia ku no ta keda na e promé stap positivo aki, pero ku por sigui konta riba kontinuidat i ampliashon di mas tipo di formashon.

Pa Chata ta di  balor grandi pa hasi siudadanonan hóben konsiente di e balor agregá imenso ku e sektor turístiko ta desempeñá den ekonomia di Kòrsou.

Unabes ku e konsiensia t’ei, esaki ta ofresé chènsnan grandi ku por haña mas i mas persona lokal  ku ta aspirá un trabou dinámiko den turismo.

Ku bista riba e tantísimo proyektonan ku ta den preparashon, e proseso aki por duna un kontribushon importante na sigui desaroyá turismo den tur su fasetanan. Mas aun si tur hende realisá ku ya kaba e sektor ta luchando ku hopi vakatura ku masha poko poko por yena ku trahadónan lokal.