KRALENDIJK- E partidonan di koalishon, MPB ku UPB den un komunikado di prensa ku a saka dajarson anochi ku lo mester a skòrs gezaghèber Edison Rijna. 

E dos partidonan ta splika ku e señal di posibel violashon di integridat di parti di gezaghèber a jega na miembro nan di konseho insular. “Integridat den polítika ta di sumo importansia pa bo por krese bon gobernashon i konfiansa ku e pueblo mester tin den su mandatarionan i tambe nan representante di pueblo” asina MPB i UPB a deklará.

“Tur mandatario òf un miembro di konseho insular por keda afektá pa señalnan di integridat den su kontra. Kisas ela hasi algu inkonsientemente pero maske kon chikitu e señal ta, mester trata i papia riba esaki pa asina por madurá den komportashon i sòru pa sierto kosnan no tuma lugá mas”, asina a sigui splika. 

Dia 29 di yanüari 2019 konseho insular di Boneiru a aprobá un asina yamá ‘Akuerdo di Integridat’ pa loke ta trata integridat den polítika I kon ta atende ku mandatarionan den kasonan di posibel violashon di integridat. 

Segun e dos partidonan, e moshon presentá dor di koalishon di MPB-UPB ta basá kompletamente riba e ‘Akuerdo di Integridat’. Sin distinshon di persona, koló polítiko òf kredo, e koalishon a aktua manera a keda palabra. 

No a skòrs Rijna

MPB i UPB den nan deklarason ta enfatisá ku no a a skòrs gezaghèber òf ku lo mester a pone gezaghèber riba nòn aktif. “Esaki no ta posibel pasobra no ta konseho insular a nombra e gezaghèber sino ta Rey Hulandés. E ‘Akuerdo di Integridat’ tampoko no por wòrdu enforsá hurídikamente. E ta un dokumento ku a firma boluntariamente i nos a kompremeté nos mes pa sigui e prosedura manera deskribí den e dokumento”. 

“Partidonan di koalishon ta haña importante pa a alsa e proseso riba polítika partidista, i koalishon tin e konfiansa ku e resultadonan i rekomendashonan aki dos siman ta konosí. Gezaghèber manera a spera di dje lo duna tur koperashon i boluntariamente elo duna tur espasio pa e investigashon kana su kaminda bou di kordinashon di e gezaghèber interino”, asina e partidonan di koalishon a konkluí.