KRALENDIJK- Segun èks miembro di konseho Insular, Michale Pieters, durante tratamentu di presupuesto pa aña 2023 den reunionnan di Komishon Fiho den Konseho Insular e siman aki por a konkluí ku e gobièrnu aktual pa 4 aña largu no tabatin un vishon ni maneho riba ningun área di gobernashon.

“Ta desishonnan ‘ad hoc’ tabata keda tumá pa e gobièrnu di MPB/UPB i fabornan hasí na amigunan dor di krea e famoso OvO i apliká esaki na gran eskala. Esaki ta duna e posibilidat ku kontrali na un akuerdo di trabou por duna un persona of instansha trabou sin aprobashon di Representante di Reino”, asina Pieters a bisa. 

Segun Pieters a sigui bisa, e ta haña ku pa 4 aña largu tabatin un desaster pa ku gobernashon insular aki na Boneiru. “Desaroyonan ku a tuma lugá den e 4 aña nan aki ta netamente proyektonan ku Hulanda tabata e katalisador den esakinan mustrando obviamente ku di parti di gobernashon di MPB/UPB no tabatin ningun inisiativa propio pasombra simplemente e gobièrnu aki no tin un vishon ni un plan di maneho”. 

Sosten na Demokrat

Na opinion di Pieters a yega ora pa pueblo di Boneiru duna un sosten mayoritario na Partido Demokrat ku Clark Abraham na kabes pa por trese un buèlta den e forma ku ta goberná e isla di Boneiru i pa stipulá un maneho a korto i largo plaso pa ku futuro desaroyo di nos isla.

Según Pieters, e pueblo di Boneiru lo keda gradesido pa e forma kon Partido Demokrat lo bai sòru pa un adelanto riba tur área netamente na benefisio i bienestar di e pueblo.