WILLEMSTAD – Ku mas ku 355.000 turista den e promé nuebe lunanan di e aña aki, Kòrsou ta bèk riba e nivel di promé ku e pandemia di Corona. Asina Ofisina di Turismo di Kòsou, CTB, ta informá.

Na 2019 a bini den e mésun periodo 346.000 turista ku a keda minimal un anochi. CTB ta spera di alkansá na final di e aña aki e kantidat di yegada ku a realisá na 2019 i ku asta lo yama bonbiní na un kantidat rèkòrt di turista di estadia si e sirkumstansianan keda asina.

Sèptèmber

Na luna di sèptèmber a bini mas ku 37.000 turista di estadia na nos isla. Esei ta 15 porshento mas ku e mésun luna na 2019, ora ku 32.000 turista di estadia a bishitá Kòrsou.

Mayoria turista ta bini di Hulanda, Estados Unido di Merka i Colombia. E tres paisnan aki ta kubri 71 porshento di tur turista di estadia den sèptèmber.

Na tur 64 porshento di tur bishitante a skohe un risòrt komo nan tipo di akomodashon, 39 porshento a keda den akomodashonnan alternativo. CTB a registrá na sèptèmber un estadia promedio di 9.5 anochi, 

Merkadonan

Europa ta keda e region mas fuerte pa Kòrsou i na sèptèmber un total di kasi 20.000 bishitante Europeo a biaha pa nos isla. Esei ta kasi 52 porshento di e total yegadanan di turista di estadia. Kasi 16.000 a bini di Hulanda. Otro merkadonan dentro di e region di Europa tambe a presta bon. For di Alemania i Belgika a bini respektivamente 1.076 i 766 bishitante.

For di e region Norteamerikano a registrá un total di kasi 8.500 bishitante, loke ta kontribuí na mas ku 22 porshento di e total di yegadanan. For di Estados Unido a yega Kòrsou mas ku 8.000 bishitante. E kantidat di turista di estadia di Estados Unido ta eksepsional. Den añanan anterior e kantidat di turista di estadia na sèptèmber nunka a surpasá mas ku 5.000 bishitante. Ora CTB a kompará ku e mésun luna na 2019 a registrá 3.500 bishitante di Estados Unido.

Ta di kuater luna konsekutivo ku CTB ta mira un kantidat rekòrt di yegada di merkado Merikano. Kòrsou ta ofresé awor un kantidat mas grandi di risòrtnan Merikano, ku spesialmente ta gustá riba merkado Merikano.

For di e region Suramerika a bini 6.000 bishitante Kòrsou. Mas ku dos mil ta bishitantenan di Colombia. Na 2019 CTB a registrá den sèptèmber masoménos e mésun kantidat. Mas ku 1.000 turista di estadia a bini di Brasil.