WILLEMSTAD – E agitashon persistente ta motibu pa minister di kultura, señor Van Heydoorn a anunsiá un investigashon. E ke sa si a violá e reglanan ku tur kandidato mester a tene nan na dje, si a violá derechonan di outor i si tin partisipante ku a haña un trato preferensial durante e prosedura di selekshon. 

Ta parse ku den e emblema nashonal nobo di Kòrsou tin ilustrashonnan di e banko di data di pòtrèt Shutterstock. Ta sigui kibra e ganadó onlain, pero e mes ta nenga ku el a kometé plagia.

E último dianan tin hopi krítika riba su diseño: kolibri no ta e para nashonal di Kòrsou i e no ta blou sino bèrdè, e kadushi manera el a ilustr’é no ta di Kòrsou i e boto parse un ‘go-fast’ Venezolano.

Pa e konsepto ganadó a ofresé 15.000 florin. A entregá 205 diseño pa e kompetensia pa yega na un emblema nashonal nobo.