WILLEMSTAD – Promé Minister di Kòrsou Gilmar Pisas ta bai dirigí su mes por eskrito na Promé Minister Mark Rutte di Hulanda tokante di skrapmentu di mitar di tur buelo di KLM pa e wenter benidero aki.

Representante di e sektor hospitalario di CHATA, sektor empresarial ku ta unifiká den VBC, Kamara di Komersio i partnernan di Curaçao Airport lo duna puntonan di salida pa e karta aki.

Nan lo mustra kiko ta nifiká si KLM ta ehekutá un buelo so pa dia te ku fin di mart na lugá di dos. Un konteo rápido ta mustra ku mas ku 30.000 stul ta kai afó. Sektor privá ta pensa riba un pèrdida di entrada di no ménos ku 60 mion florin.

E karta mester kondusí ku KLM ta drei e desishon bèk, un desishon ku ta konsekuensia di problemanan na Schiphol. Sektor privá en kambio ta pensa ku skrapmentu di e di dos buelo ta konsekuensia di e echo ku a habri buelo pa Hapon, kaminda KLM por bula atrobe. E sektor ta reklamá, ku e 777-300 ku 320 stul ku ainda ta bulando pa Kòrsou, ta bai bula e ruta di Hapon.