Den e di tres kuartal di 2022, produkto i servisio di konsumo na Boneiru tabata 12,2 % mas karu ku e aña anterior. Den e di dos kuartal e inflashon ainda tabata 9,4 porshento. E oumento aki ta prinsipalmente debí na e oumento di preis di kuminda, koriente i  kombustibel. CBS ta indiká esaki a base di e índise di preis pa konsumidó na Hulanda Karibense.

Na Sint Eustatius preis anual a subi ku 9,0 porshento den e di tres kuartal di 2022. Den e di dos kuartal esaki ainda tabata 7,7 porshento. Na Sint Eustatius, por atribuí e oumento na e subida di preis di koriente i transporte. 

Inflashon na Saba a oumentá di 8,2 porshento den e di dos kuartal pa 9,7 porshento den e di tres kuartal. Spesialmente e subida di preis di kuminda, koriente i transporte a sòru pa e oumento di inflashon na Saba. 

Preis na Boneiru a oumentá ku 3,7 porshento kompará ku e kuartal anterior 

Kompará ku e di dos kuartal di 2022, preis na Boneiru a subi den e di tres kuartal  ku 3,7 porshento. E oumento aki ta debí, prinsipalmente, na e oumento di preis di koriente (16,1 porshento). Preisnan di kuminda i bibidanan no alkohóliko a subi ku 3,4 porshento. Preis di gasolin a subi ku 13,4 porshento i buelonan a bira 4,9 porshento mas karu. 

Preis na Sint Eustatius a oumentá ku 2,9 porshento kompará ku e kuartal anterior  

Preis pa konsumidó na Sint Eustatius a subi den e di tres kuartal di 2022 ku 2,9 porshento kompará ku e di dos kuartal. Preis di koriente a subi ku 19 porshento. Preis di transporte a subi ku 5,4 porshento den e di tres kuartal. E oumento aki ta debí na e subida den preis di gasolin ku 6,0 porshento i buelonan ku 6,2 porshento. E oumento di 5 porshento den e preis di horeca tabata remarkabel.

Preis na Saba a oumentá ku 3,2 porshento kompará ku e kuartal anterior  

Na Saba, produktonan di konsumo tabata promedio 3,2 porshento mas karu den e di tres kuartal di 2022 kompará ku e kuartal anterior. 

Preis di kuminda i bibida no alkohóliko a subi ku 2,1 porshento den e kuartal pasá kompará ku e kuartal anterior. Preis di koriente a subi ku 8,5 porshento. Na Saba, preis di transporte a subi ku 9,8 porshento den di tres kuartal . Gasolin tabata 5,3 porshento mas karu i buelonan a subi ku 17,1 porshento na preis. 

Webu mas karu na Boneiru i Saba 

Den e publikashon relashoná ku e di dos kuartal, CBS a informá ku preis di webu a subi notablemente na tur e tres isla. Na Sint Eustatius, webu a bira 51,7 porshento mas karu, na Saba 28,1 porshento  i na Boneiru 16,3 porshento den e di dos kuartal .

Den e di tres kuartal, e kuartal ku a kaba di pasa, preis di webu na Saba a sigui oumentá ku 8,9 porshento, na Boneiru preis a subi ku 8,7 porshento i na Sint Eustatius preis di webu a baha ku 13,8 porshento. 

Sifranan preliminar

E sifranan di e di tres kuartal di 2022 ta preliminar i lo stipulá nan definitivamente na momento di publikashon di e di kuater kuartal di 2022.

Fuentenan: 

StatLine – Hulanda Karibense 

https://opendata.cbs.nl/CBS/nl/dataset/84046NED/table?dl=BFA9