KRALENDIJK- Djasabra anochi, nèt un dia ku Union Patriótiko Boneriano (UPB) ta selebrá su di 53 aña di eksistensia, e partido bèrdè a organisá un enkuentro na kas Patriótico. Durante e anochi a presentá algun persona riba esenario i e lidernan  di UPB, kendenan a papia di e plan ku tin pa partido, elekshon binidero i mas.  

E anochi a kuminsá ku animashon di grupo Krioyo Foyan Boys i despues Maritsa Silberie, a hasi orashon huntu ku tur presente.  Promé persona ku a papia e anochi tabata Luty Balentin.  

“Mi ta manda saludo pa Rudy Elis i tur otro fundadó di partido UPB. Nos ke pa pueblo sa unda UPB ta, i kon ta sigui. Na 2019 e partido aki a bira poko chikitu di loke e tabata ta. Ta notabel no tin un organisashon fuerte na Boneiru. UPB ke ta un organisashon fuerte, pa e hendenan. Boneiru a stòp di lucha pa su hendenan. Nos mester di voto di e hendenan, pa nos por sigui e lucha pa bira fuerte. Mas voto pa nos, nos ta mas den e pueblo, i huntu ban sigui pa un mihó Boneiru. Nos hendenan meresé”, asina Balentin a bisa. 

Lider di partido Pablo James Kroon a bisa di ta kontentu di mira kuantu hende ta presente na e anochi. “E mensahe di UPB ta yegando serka e hende”, asina Kroon a bisa. Tambe presente tabata lider di e frakshon den Konseho Insular, dra. Esther Bernabela. Bernabel a bisa ku semper e enfoke di UPB tabata e hende, pero ku lo mester bai enfoká ainda mas riba esaki 

Kara nobo

Tambe durante a anochi a introdusí entre otro Karel Visser, Yona Chirino i Marvin Abdul komo persona ku lo respaldá UPB den próksimo elekshon. Abdul i Chirino a hiba palabra kòrtiku pa a motivá e echo ku nan ta bai aportá UPB. Karel Visser tambe lo mester a hiba palabra, pero pa motibu di trabou a yega mas lat ku a premirá.