WILLEMSTAD – Trintiseis artista lokal a duna oido na e yamada pa traha un obra di arte ku un rosa inkorporá den dje pa Art for the Roses. Djasabra último tabatin apertura  di e eksposishon spesial aki ku e obranan di arte na Landhuis Bloemhof.

Por bishitá e eksposishon durante e orarionan ku Landhuis Bloembof ta habrí anto e ta un preparashon pa un findishi riba 19 di novèmber, kaminda e ganashi ta bai pa kombatimentu di kanser di Wilhelminafonds.

Por bider for di awor riba e obranan di arte den un asina yamá ‘findishi silensioso’. E proseso aki ta terminá riba 19 di novèmber ora ku e anochi ei ta sigui e findishi final, dirigí pa e kabesantenan di findishi Michèle Russel-Capriles i Dimitri Cloose.

Fuera di kuadronan tin tambe pòtrèt i otro formanan di ekspreshon kreativo. E partisipante mas hóben ta un studiante di 14 aña i esun mas grandi ta un señora di 70 aña.

Aktividatnan

A planiá mas aktividat rondó di e eksposishon i tur ta pa generá entrada pa e bon kousa. Lo tin un Konsierto di Roses den koperashon ku Kathedraal van Doornen i Number Ten, un Marshe di Pasku, un nochi di sine na Hòfi Cinema, tayernan di Intuïtief Schilderen, un evento di Bloemhof by Night ku diferente artista i durante henter luna Number Ten ta ofresé komo spesialidat un aperitivo a la Roses.