WILLEMSTAD – Siman di buki pa Mucha ta kuminsá otro siman 31 di òktober i ta dura te ku 4 di novèmber. Siman Ban Lesa, manera ta yam’é na Papiamentu, ta e evento literario mas grandi ku ta bini bèk tur aña pa muchanan na Kòrsou.

Outornan di e isla i algun otro outor ku ta invitá for di eksterior ta bishitá skolnan riba e isla pa konta kuenta i pa aktua .

Un di e outornan ku ta partisipá ta Loekie Morales. Pa basta aña kaba e ta un di e bishitantenan preferí durante Simannan di Buki pa Mucha di Sürnam i Islanan den Karibe. E aña aki e ta bishitá nuebe skol i diferente seshon pa firma buki i eventonan sosial despues di orario di skol.

Resientemente Morales a publiká su 4 bukinan spiritual mas nobo: ‘Emma La’s Gouden Hart’, ‘Emma La’s Gouden Hartje’, ‘El Corazon de Oro de Emma La’ i ‘E Kurason di Oro di Emma La’.

Kuida i kompartí 

E buki aki ta pa e grupo di sinku pa shete aña i ta trata di Emma La, un mucha di sinku aña, ku tin hopi empatia. E ta salí for di un famia migrante di medio klase ku ta traha duru den un pais riku i tin tur kos ku su kurason ta deseá.

Pero e ta pensa tur ora riba su famia den nesesidat na e pais madre di su mama. E ta yuda su mama pa hasi e bida di su famia den eksterior mas fásil.

“Esaki ta un storia tokante kuida i kompartí, mi a dokument’é for di bida real ora mi a bishitá Orlando, Florida dos aña pasá”, Morales ta bisa.

Pobresa i hamber

“Henter e storia di Emma La ta pas den e Global Goals 1 i 2, temanan di Nashonnan Uní. Kombatimentu di pobresa ekstremo i eradikashon di hamber ta e promé seri di metanan mundial ku ta implementando na kasi kada pais rònt mundu.

Un tarea enome pa gobièrnu, pero tambe pa NGO’s, sektor partikular, mundu akadémiko i otro gruponan. Paisnan mester hiba e lucha aki na un nivel mas haltu pa traha huntu den region i internashonal pa alkansá e metanan aki. Emma La ta un storia real, fásil pa lesa pa e grupo meta”, e ta splika.

Morales a sigui un kurso por eskrito pa diferente edat, kaminda ta usa e sistema AVI pa fasiná kada grupo meta mihó.

Ku e buki aki, ku tin komo tema pa ta un bon siudadano, yuda bo mes i otronan i kuida otro, Loekie Morles lo partisipá na e evento Siman Ban Lesa.