KRALENDIJK- Na Boneiru mas ku 700 hende ku entrada abou a inskribí pa e kompensashon di 1.300 dòler pa koriente òf Pagabon. Den e grupo akí no a konta e mas o ménos 300 hendenan ku a haña e kompensashon promé pa motibu di nan situashon privá. Esei Direktorado Komunidat i Kuido ta informá. 

Den pasado via Komunidat i Kuido, siudadanonan a pidi un kompensashon por ehèmpel pa kumpra artíkulo di skol, un bòter di gas, instalashon di Pagabon. Pero ta promé biaha ku asina tantu hende a pidi un kompensashon. Komunidat i Kuido ta tene kuenta ku mas hende ta bai pidi e kompensashon.

Den práktika a sali na kla ku hendenan ta duda si nan ta bin na remarke pa e kompensashon. Otronan ta haña ku nan mester entregá muchu dokumento. Empleadonan di e direktorado ta tene kuenta ku tin hende ku kisas tin bèrgwensa pa pidi e kompensashon.

Terrence Jansen ta mènedjer di e proyekto ‘No Laga Koriente Dal Bo Duru.’ Segun Jansen, esnan ku ta duda simplemente tin ku pidi e kompensashon. ,.Mi ta konsehá hendenan ku ta duda si nan ta bin na remarke, pa tòg pidi e kompensashon. Nos ta ripará tambe ku tin biaha hendenan no ta komprondé bon kua ta e kondishonnan. I p’esei nan no ta inskribí.”

Kuidadoso

Empleadonan di e direktorado ta trata e petishonnan kuidadosamente. Tin un otro motibu pa ora ta duda, tòg pidi e kompensashon. ,,Si bo no pidi e kompensashon, e ora ei ta sigur ku bo ta pèrdè e chèns pa haña esaki. Esun ku no purba, nunka lo no logra, “Jansen ta splika.

For di 14 di òktober di e aña akí, siudadanonan por pidi e kompensashon. Esei por online òf personalmente durante enkuentronan den bario. Pa mas informashon: www.bonairegov.com,  mira na ‘Kampaña’.