WILLEMSTAD – E situashon alamante di kasnan di kuido na Kòrsou no ta motibu pa Hulanda intervení den e direktiva di Kòrsou. Esei Sekretario di Estado Van Huffelen ta skirbi despues di preguntnan di miembro di Kamer pa Groen Links Kauthar Bouchallikht.

Anteriormente Caribisch Netwerk a informá ku kasnan di kuido na Kòrsou tambe ta dependé di donashonnan pa por kuida grandinan. Gobièrnu ta duna asina tiki supsidio ku e grandinan mester kompartí nan kuminda ku otro.

“No ta bon ku hendenan den Reino ta biba bou di semehante situashon den kasnan di kuido”, sekretario di estado Alexandra Van Huffelen (Relashonnan di Reino, D66) ta skirbi. “Ta rekonosé esei na Kòrsou tambe i e ta preukupámi tambe.”

Kabinete di Hulanda ta poniendo ‘diferente stap’ pa huntu ku gobièrnu di Kòrsou mehorá kuido riba e isla.

Intervenshon di Hulanda no ta riba agènda

Kabinete di Hulanda ta kompartí e opinion di Groen Links ku aki ta trata di un derecho humano. Pero e situashon alarmante den kuido di grandinan no ta motibu pa Den Haag intervení den gobièrnu di Kòrsou, segun señora Van Huffelen.

A base di e notisia e ministerio Hulandes di Salubridat Públiko, Bienestar i Deporte a hasi pregunta na e ministerio di Salubridat, Medioambiente i Naturalesa na Kòrsou. Kòrsou a indiká di bai investigá e problema di sèn, di moda ku por bini ku un solushon struktural, segun señora Van Huffelen.

Aruba, Kòrsou i Sint Maarten, igual ku Hulanda, mes ta responsabel pa kumpli ku derechonan humano. Segun e sekretario di estado, intervenshon ta tuma lugá komo e último medio ora ku tur e instanshanan responsabel riba e isla mes no por hasi nada ku e problema.

No a pidi sèn serka gobièrnu Hulandes

Na e kas di kuido mas grandi, Betesda, no ta kompartí kuminda ku otro, pero e instituo ei tambe ta den nesesidat finansiero grandi. Nan no ta logra di yega na fondonan via di institutonan Hulandes, ya ku Betesda no tin un situashon finansiero sano, asina e direktora Natasja Rog a trese dilanti. “Nos presupuesto no ta ekilibrá, nos no por kumpli ku nos obligashonnan”.

E miembro di Kamer pa Groen Links Bouchallikht kier sa si a hasi e petishon ei tambe na Den Haag. “No a bini un petishon pa sosten finansiero pa e problema spesifiko aki”, Señora Van Huffelen ta reakshona bisando.

Palabrashonnan ku Hulanda pa mehorá kuido

Den 2021 si Hulanda a palabrá ku Kòrsou pa huntu mehorá kuido riba e isla, segun señora Van Huffelen. Su speransa ta ku pa fin di 2022 lo sali un rapòrt ku rekomendashonnan. Segun señora Van Huffelen e grupo di trabou ku ta hasi investigashon a pidi Kòrsou pa duna atenshon na e situashon di kuido den kasnan di kuido.