WILLEMSTAD – Gobièrnu i CMC a traha un plan pa sanea e debenan di hòspital nobo. E asina yama ‘hoofdlijnenakkoord’ ta konsistí di djeskuater tema i tin komo base e rapòrt di e Nederlandse Zorgautoriteit NZa, kual ta e Outoridat Hulandes riba tereno di  kuido, ku a investigá kon CMC ta funshoná na Kòrsou.

A apuntá djesdos eksperto den un grupo di kordinashon. Nan ta analisá e konklushonnan di e raport di Nza i a base di esei nan lo presentá otro mañan un plan di akshon.

Despues Inspekshon di Salubridat Públiko ta investigá e listanan di espera pa kuido ku no ta grave i CMC mes mester pèrkurá pa produsí e kuentanan anual di 2019 i 2020 rápido.

Tambe mester bira konosí ken ta responsabel pa gastunan di kuido pa esnan ku no ta sigurá, manera personanan sin un pèrmit di residensia. E koperashon ku ADC, Analytisch Diagnostich Centrum, mester keda, ounke mester revisá e akuerdo di nobo.

Den e grupo di kordinashon aki tin personanan di HNO, ministerio di Salubridat Públiko, Komishon Nashonal di Restrukturashon (Nationale Hervormingscommissie), kompania di seguro SVB, e Outoridat riba tereno di kuido di Kòrsou ku mester lanta ainda i e ministerio di Tráfiko i Transporte.

Si no intervení, fin di e aña aki CMC tin un debe di 200 mion florin. E pèrdida di eksplotashon ta mas ku 50 mion florin pa aña, loke ta nifiká un mion florin pa siman. Durante di e konferensia di prensa a bini dilanti ku en todo kaso e hür di e kompleho di hòspital ta muchu haltu.